Երևանում կարձանագրվեն չվճարողները. ավտոբուսներում հաշվիչ համակարգ է տեղադրված

Երևանի քաղաքապետարանն արդեն տեխնիկական հնարավորություններ ունի արձանագրելու, թե ուղևորներից ով չի վճարում տրանսպորտի ուղեվարձը։ 2024 թվականի պետական բյուջեի կատարողականի հաշվետվության քննարկման ժամանակ այս մասին հայտնել է Երևանի քաղաքապետ Տիգրան Ավինյանը։

Նրա խոսքով՝ ուղևորների մոտ 80%-ը բարեխիղճ վճարում է ուղեվարձը, բայց կան նաև մարդիկ, որոնց չի հետաքրքրում, որ առանց նորմալ վճարման տրանսպորտը նորմալ չի աշխատի։ Ավինյանի խոսքով` նրանց միայն մի բան է հետաքրքրում՝ պատասխանատվություն կկրեն, թե ոչ։

«Բայց ավտոբուսներում և դռների վրա արդեն ունենք ոչ միայն տեսախցիկներ, այլ նաև համակարգ, որը թույլ է տալիս արձանագրել, թե ով է փորձում վճարում կատարել չգործող քարտով կամ QR-կոդով»,- ասել է Ավինյանը:

Նրա խոսքով՝ տրանսպորտում վալիդատորների խափանումներ լինում են, բայց քիչ դեպքերում։

Քաղաքապետը չի հստակեցրել, թե այդ համակարգի հիման վրա երբ է պլանավորվում սկսել տուգանել ուղևորներին կամ հսկիչների ծառայություն հիմնել։