Բաքվի դատարանը կրկին մերժել է Ռուբեն Վարդանյանին

Բաքվի դատարանը կրկին մերժել է Արցախի նախկին պետնախարար Ռուբեն Վարդանյանի միջնորդությունները։ Այս մասին հայտնում են ադրբեջանական լրատվամիջոցները։

Ըստ հաղորդագրությունների` առաջին միջնորդությունը վերաբերել է մեղադրական եզրակացության պատճենը Վարդանյանի ընտանիքին տրամադրելուն։

Արցախի նախկին պետնախարարը դիմել է ևս մեկ միջնորդությամբ, որպեսզի փորձաքննություն անցկացվի և ստուգվի, թե որքանով է իր քրեական գործը ճիշտ թարգմանվել ռուսերենով։ Այս միջնորդությունը նույնպես մերժվել է։

Հաջորդ «նիստը» նշանակվել է հունիսի 17-ին:

Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք: