Երկու համայնքների միավորման քննարկում կա. Խուդաթյան․ «Հետք»

Տարածքային կառավարման և ենթակառուցվածքների նախարար Դավիթ Խուդաթյանը «Հետքի» հետ զրույցում հաստատել է, որ մոտ 10 օր է` քննարկվում է Խոյ և Վաղարշապատ համայնքների միավորման հարցը: Ընթացակարգերով պայմանավորված` հնարավոր է գործընթացն ավարտել մինչև 2025թ. վերջ: Նախարարի փոխանցմամբ՝ պատճառը քաղաքական չէ, և չի բացառվում, որ առաջիկայում այլ համայնքներ ևս վերամիավորվեն:

«Պատճառն այն է, որ Վաղարշապատ համայնքը բավարար չափով չի խոշորացվել: Բացի Վաղարշապատից, մենք այնպիսի խոշորացված համայնք չունենք, որին ընդամենը մեկ գյուղական բնակավայր է միացել: Հիմա գնում ենք արդյունավետ կառավարման ճանապարհով, այսինքն՝ խոշորացնում ենք համայնքը, ինչպես այլ համայնքներում է եղել»,-ասում է Տարածքային կառավարման և ենթակառուցվածքների նախարարը:

Վաղարշապատը խոշորացվել է 2021թ-ին, այսինքն` ոչ վաղ անցյալում, Էջմիածին քաղաքին միացել է Ոսկեհատ գյուղը, Դավիթ Խուդաթյանից հետաքրքրվեցինք` արդյոք հնարավոր չէր այդ ժամանակ նշվածը հաշվի առնել:

«Մեծ հաշվով Վաղարշապատը չի խոշորացվել, մի գյուղ է միացել: Հիմա խոշորացված համայնք անվանը բովանդակություն ենք ուզում տալ: Սա շարունակական պրոցես է, չեմ բացառում, որ առաջիկայում ավելի մեծ միավորներ ստեղծվեն: Վաղարշապատում ընդամենը գործընթացը մի փոքր առաջ ընկավ՝ պայմանավորված համայնքի ղեկավարի հրաժարականով: Սա նախատեսում էինք իրականացնել 2026թ-ին՝ ՏԻՄ ընտրություններին զուգահեռ»,- լրատվամիջոցի հետ զրույցում ասել է նախարարը` հավելելով, որ 2016-2017թթ. ևս վերամիավորումներ եղել են, և Վաղարշապատն այդ գործընթացի շարունակությունն է:

Մանրամասները՝ սկզբնաղբյուրում։