Պակիստանը՝ Հնդկաստանի հարվածների հետևանքով նոր զոհերի մասին

Geo հեռուստաալիքը հղում անելով Պակիստանի բանակի հասարակայնության հետ կապերի վարչության գլխավոր տնօրեն, գեներալ-լեյտենանտ Ահմեդ Շարիֆ Չաուդհրիին հայտնում է, որ Պակիստանում Հնդկաստանի ռազմական հարվածի հետևանքով զոհվել է առնվազն 24 մարդ, վիրավորվել՝ 46-ը:

Ավելի վաղ Հնդկաստանի պաշտպանության նախարարությունը հայտարարել էր, որ Փահալգամում տեղի ունեցած ահաբեկչական հարձակմանը ի պատասխան սկսել է «Սինդուր» գործողությունը՝ հարվածներ հասցնելով Պակիստանում ահաբեկչական ենթակառուցվածքներին։

Գերատեսչությունը նշել էր, որ գործողության ընթացքում Պակիստանի ոչ մի ռազմական օբյեկտ հարձակման չի ենթարկվել։ Իր հերթին, Պակիստանի իշխանությունները հայտարարել են, որ Հնդկաստանը հարձակվել է Պակիստանի հինգ բնակավայրերի վրա, հարվածների արդյունքում զոհվել է առնվազն ութ և վիրավորվել 35 մարդ։

«Զոհերի մասին լրացուցիչ տեղեկություններ տրամադրելով՝ Պակիստանի բանակի հասարակայնության հետ կապերի գլխավոր տնօրեն, գեներալ-լեյտենանտ Ահմեդ Շարիֆ Չաուդհրին հայտնել է, որ Հնդկաստանի օդային հարվածների հետևանքով տուժած վեց քաղաքներում զոհերի թիվը հասել է 26 քաղաքացիական անձի, իսկ 46 մարդ վիրավորվել է», - նշել է հեռուստաալիքը։

Նշենք, որ ըստ «Սամաա» հեռուստաալիքի, հարվածների հետևանքով վիրավորվածների թիվը հասել է 61-ի։