Հենրիխ Մխիթարյանը գրառում է կատարել մեծ հաղթանակից հետո
Իտալիայի սիրտը բաբախում է սև և կապույտ գույներով։ Այս մասին ինստագրամյան իր էջում գրել է Հայաստանի ֆուտբոլի ազգային հավաքականի նախկին ավագ, Միլանի «Ինտեր» ֆուտբոլային ակումբի կիսապաշտպան Հենրիխ Մխիթարյանը։
«Մենք ամեն ինչ տվեցինք։ Մենք հավատացինք մինչև վերջ․ միասնական, որպես մեկ թիմ։ Մեր երկրպագուների հետ միասին, ովքեր մեզ առաջ էին մղում ամեն վայրկյան։ Սրանք անհավանական զգացողություններ են։ Իտալիայի սիրտը բաբախում է սև և կապույտ գույներով։ Առաջ, Ինտեր։ Միշտ»,-գրել է նա։
Հիշեցնենք, որ Չեմպիոնների լիգայի կիսաեզրափակչի պատասխան խաղում «Ինտերը» մրցել է «Բարսելոնայի» դեմ և լրացուցիչ ժամանակում 1 գոլի (7։6) առավելությամբ հաղթել «Բարսելոնային»։
Նշենք, որ Հայաստանի հավաքականի նախկին կիսապաշտպան Հենրիխ Մխիթարյանը իր թիմի մեկնարկային կազմում էր և փոխարինվեց 79-րդ րոպեին։
