Նրանց պատճառով «իսպանական ամոթ» եմ ապրել. Խանդանյան

ՔՊ-ական պատգամավոր Սարգիս Խանդանյանն «իսպանական ամոթ» է ապրել ընդդիմադիրների պատճառով։

ԱԺ-ում այսօր նա հայտարարեց, որ Վալենսիայում կայացած ԵԺԿ համագումարին «Պատիվ ունեմ» խմբակցության ղեկավար Հայկ Մամիջանյանն ու «Ժառանգություն» կուսակցության նախագահ Րաֆֆի Հովհաննիսյանը կոչ են արել դեմ քվեարկել Հայաստանի վերաբերյալ բանաձևին։

«Բավականին լավ բանաձև էր, խոսում էր ՀՀ-ում ժողովրդավարական առաջընթացի, մարդու իրավունքների, օրենքի գերակայության բնագավառում ռեֆորմների մասին, ԵՄ-ի հետ մերձեցման մասին, գերիների ազատ արձակման մասին և այլն։ Ու ահա առաջ է գալիս իսպանական ամոթը»,- հայտարարեց ՔՊ-ականը։

Նրա խոսքով՝ ԵԺԿ-ն 3 ձեռնպահ քվեարկությամբ ընդունել է բանաձևը։

«Ասում են, թե այդ բանաձևը գրվել է ՔՊ գրասենյակներում, շատ տարակուսելի է այս պնդումը, որովհետև, այդ պարագայում, օրինակ, Եվրոպական պառլամենտի բանաձևերը ևս գրվում են ՔՊ-ում, ՔՊ գրասենյակում է, օրինակ, մշակվում ԱՄՆ–ի հետ ռազմավարական գործընկերության փաստաթուղթը և այլ։ Փաստորեն, աշխարհի ամենուժեղ կուսակցությունն ենք մենք, մեզանից, իսկապես, պետք է անհանսգտանալ»,- հեգնեց ՔՊ-ականը։

Նա ասաց, թե ընդդիմադիրների գործելակերպն արդեն ամոթի հարց չէ, այլ՝ ազգային անվտանգության։