Հնդկաստանն ԱՄՆ-ին առաջարկ է արել

Հնդկաստանն առաջարկել է չեղարկել ԱՄՆ-ից պողպատի, ավտոպահեստամասերի և դեղագործական ապրանքների սահմանափակ ներմուծման մաքսատուրքերը՝ Վաշինգտոնից նմանատիպ քայլերի դիմաց: Այս մասին հայտնում է Bloomberg-ը։

Ինչպես տեղեկացրել է պարբերականը, առաջարկը հնչել է ապրիլի վերջին հնդիկ պաշտոնյաների Վաշինգտոն կատարած այցի ժամանակ։ Երկու կողմերն էլ փորձում են արագացնել այս աշնանը երկկողմ առեւտրային համաձայնագրի կնքումը։

Bloomberg-ի աղբյուրների համաձայն՝ առանց մաքսատուրքի ներմուծումը կտարածվի միայն որոշակի ծավալի ապրանքների վրա։ Սահմանը գերազանցելուց հետո կգործեն ստանդարտ մաքսային դրույքաչափեր:

ԱՄՆ պայմանների թվում է այսպես կոչված Որակի վերահսկման պատվերների (QCOs) հետ կապված խնդիրների լուծումը, որը Վաշինգտոնը համարում է ոչ սակագնային խոչընդոտ։ Խոսքը որակի պարտադիր ստանդարտների մասին է, որոնք պետք է պահպանեն բոլոր արտադրողները, այդ թվում՝ արտասահմանյան։ Ամերիկյան կողմը դրանք անվանում է ոչ թափանցիկ եւ խտրական։

Հնդկաստանն իր հերթին պատրաստ է վերանայել այդ պահանջները որոշակի ոլորտներում, մասնավորապես՝ բժշկական սարքերի եւ քիմիական նյութերի, եւ առաջարկում է համաձայնագիր ստորագրել ստանդարտների փոխադարձ ճանաչման վերաբերյալ:

Ինչպես նշել է պարբերականը, քննարկումը դեռ շարունակվում է, եւ պարզ չէ, թե արդյոք այդ կետերը կներառվեն համաձայնագրի վերջնական տեքստում։