ՌԴ դեսպանատան և Ադրբեջանի ԱԳՆ-ի միջև շփումներ են ընթանում․ Պրիմակով

Ռուսաստանն ու Ադրբեջանը շարունակում են աշխատել Բաքվում գործող «Ռուսական տան» իրավական կարգավիճակի կարգավորման ուղղությամբ։ Այս մասին հայտարարել է  «Ռոսսոտրուդնիչեստվո» գործակալության ղեկավար Եվգենի Պրիմակովը, գրում է «ՏԱՍՍ»-ը։

«Շփումներ են ընթանում Ռուսաստանի դեսպանատան և Ադրբեջանի ԱԳ նախարարության միջև։ Այս հարցը լուծում են իրավաբաններն ու արտաքին քաղաքականության ոլորտի մասնագետները։ Այն մեր անմիջական իրավասության սահմաններից դուրս է»,- նշել է Պրիմակովը։

Նրա խոսքով՝ իրավական կարգավիճակի հարցը դեռևս մնում է բաց, սակայն «կան նախադրյալներ դրական արդյունքի հասնելու համար»։

«Կարծում ենք, որ այս հարցը պետք է լուծվի փոխադարձ գոհունակությամբ»,- ավելացրել է նա՝ պատասխանելով Բաքվում «Ռուսական տան» շուրջ ստեղծված իրավիճակին վերաբերող հարցին։