Հնդկաստանի և Պակիստանի միջև իրավիճակը սրվում է․ Պակիստանի ԱԳՆ

Հնդկաստանի և Պակիստանի միջև շարունակվում է էսկալացիան, սակայն մի շարք դիվանագիտական ուղիներ աշխատում են Իսլամաբադի և Նյու Դելիի միջև: Այս մասին հայտարարել է Պակիստանի տեղեկատվության նախարար Աթաուլլա Տարարը, գրում է «Ռիա Նովոստի»-ն։

«Վերջին 24 ժամվա ընթացքում գործ են դրվել բազմաթիվ դիվանագիտական ալիքներ։ Այո, ակնհայտ է, որ իրավիճակը սրվում է երկու երկրների միջև, և դա չի կարելի հերքել, սակայն մի շարք դիվանագիտական ուղիներ աշխատում են»,- ասել է նախարարը։

Գործակալության զրուցակիցը նշել է, որ չնայած Պակիստանի վարչապետ Շահբազ Շարիֆի և Հնդկաստանի արտաքին գործերի նախարար Սուբրամանյամ Ջայշանկարի հետ ԱՄՆ պետքարտուղար Մարկո Ռուբիոյի վերջին խոսակցություններին, Իսլամաբադի և Նյու Դելիի միջև իրավիճակը նախկինի պես լարված է մնում:

Հավելենք՝ Հնդկաստանի և Պակիստանի միջև լարվածությունը սրվել է ապրիլի 22-ին Հնդկաստանի Ջամմու և Քաշմիր նահանգի Փահալգամ քաղաքի մոտ տեղի ունեցած ահաբեկչական հարձակումից հետո:

Հիշեցնենք՝ հարձակման պատասխանատվությունը ստանձնել է «Դիմադրության ճակատ» կոչվող խումբը, որը կապված է Ռուսաստանում արգելված «Լաշկար-է-Թաիբա» ահաբեկչական կազմակերպության հետ։ Հարձակման հետևանքով զոհվել է 25 հնդիկ և մեկ նեպալցի։