Իսրայելը պաշտոնապես դիմել է մի շարք երկրների, այդ թվում՝ Ադրբեջանին
Երուսաղեմի ծայրամասերում օրեր շարունակ մոլեգնող անտառային հրդեհների ֆոնին Իսրայելի արտաքին գործերի նախարար Գիդեոն Սաարը դիմել է տասնյակից ավելի երկրների՝ հրդեհաշրջման աշխատանքներում օգնություն խնդրելով, գրում է Times of Israel-ը:
«Նախարարը դիմել է Մեծ Բրիտանիայի, Ֆրանսիայի, Չեխիայի, Շվեդիայի, Արգենտինայի, Իսպանիայի, Հյուսիսային Մակեդոնիայի և Ադրբեջանի արտաքին գործերի նախարարներին: Իսրայելը պաշտոնապես օգնություն է խնդրել նաև Հունաստանից, Կիպրոսից, Խորվաթիայից, Իտալիայից և Բուլղարիայից, քանի որ տեղական ռեսուրսները չեն կարողանում դադարեցնել արագ տարածվող հրդեհները»,- ասվում է հաղորդագրության մեջ։
Հավելենք՝ տեղի հրշեջ-փրկարարական ծառայությունը հաղորդել Է առնվազն 5 վայրում բռնկված հրդեհների մասին: Բոցը արագ տարածվել է, քանի որ շոգն ու ուժեղ քամին դժվարացրել են կրակի հետ գործ ունենալը։ Տասնյակ մարդիկ են տուժել, նրանց տեղափոխել են հիվանդանոց։
