Ուկրաինայի ԶՈՒ-ի հանցագործությունները շարունակում ենք արձանագրել․ ՏԱՍՍ

Կուրսկի շրջանի ավելի քան 280 բնակիչ զոհվել է, 430-ը հիվանդանոցներ են տեղափոխվել 2024 թվականի օգոստոսին Ուկրաինայի զինված ուժերի ներխուժման սկզբից ի վեր ։ Այս մասին իր տելեգրամյան ալիքում հայտնել Է նահանգապետի ժամանակավոր պաշտոնակատար Ալեքսանդր Հինշտեյնը, գրում է «ՏԱՍՍ»-ը։

«Ռուսաստանի առողջապահության նախարարության տվյալներով՝ օգոստոսից Կուրսկի մարզում վնաս է հասցվել 791 մարդու առողջությանը, նրանցից 288-ը մահացել են, 430-ը տեղափոխվել են հիվանդանոցներ։ Եվ այդ սարսափելի թվերը, ավաղ, սպառիչ չեն. զոհված խաղաղ բնակիչների ոչ բոլոր մարմիններն են հաջողվել դուրս բերել սահմանամերձ տարածքից»,- գրել է նա։

Նրա խոսքով՝ Կուրսկի շրջանի ազատագրումից հետո ռազմական քննիչները շարունակում են արձանագրել Ուկրաինայի զինված ուժերի հանցագործությունները, արդեն հարուցվել է 479 քրեական գործ։