ՌԴ-ը ռմբակոծել է Ուկրաինան․ կան տուժածներ և զոհեր

Անցած գիշերվա ընթացքում ՌԴ-ն հարվածել է Ուկրաինային ավելի քան 100 անօդաչու թռչող սարքով: Այս մասին իր Telegram-ալիքում գրել է Ուկրաինայի նախագահ Վլադիմիր Զելենսկին: Նա մանրամասնել է, որ այս շաբաթվա ընթացքում ՌԴ-ն կիրառել է 375 հարվածային անօթաչու, որից 190-ը՝ Շահեդ-ներ:

«Խարկովում հարվածների հետևանքով վիրավորվել է 45 մարդ, այդ թվում 2 երեխա։ Դնեպրում, ցավոք, 1 մարդ զոհվել է: Դոբրոպոլյեում դրանք հարվածել են շենքին, վնասվել են ավտոբուսներ և մեքենաներ»,- գրել է Ուկրաինայի նախագահը:

Նա հավելել է, որ ռուսական անօդաչու թռչող սարքերը շարունակում են ամբողջ առավոտ թռչել Ուկրաինայի երկնքում։

«Եվ այսպես, ամեն օր: Մեզ անհրաժեշտ են հավելյալ հակաօդային պաշտպանության համակարգեր՝ մեր ժողովրդին պաշտպանելու համար, ինչը անհնարին կդարձնի Ռուսաստանի կողմից նախաձեռնվող օդային ահաբեկչությունը», - նշել է Զելենսկին։