Կեղծվում և նսեմացվում է Խորհրդային միության դերը․ Պուտին

Ռուսաստանն այսօր կանգնած է Երկրորդ համաշխարհային պատերազմի արդյունքների կեղծման լուրջ մարտահրավերների առջև, կարևոր է դիմակայել ռասիզմի, նեոնացիզմի, ռուսատյացության և այլ կործանարար գաղափարախոսությունների տարածմանը: Այս մասին հայտարարել է ՌԴ նախագահ Վլադիմիր Պուտինը  գրում է «Ռիա Նովոստի»-ն։

«Այսօր, երբ մենք բախվում ենք լուրջ մարտահրավերների, երբ շահադիտական քաղաքական շահերի համար վերանայվում, կեղծվում են 20-րդ դարի ամենադաժան պատերազմի արդյունքները, նսեմացվում է Խորհրդային միության դերը հաղթանակի հասնելու գործում, կարևոր է համախմբված լինել անցած պատերազմի մասին ճշմարտությունը պաշտպանելու հարցում», - ընդգծել Է Պուտինը:

Նրա խոսքով՝ անհրաժեշտ է դիմակայել ռասիզմի, նեոնացիզմի, ռուսատյացության, հակասեմիտիզմի, այլ կործանարար գաղափարախոսությունների ցանկացած ձևերի տարածմանը:

«Դա մեր պարտքն է վետերանների և ապագա սերունդների առջև։ Ամուր հիմք՝ ժողովուրդների միջև անվտանգ և արդար խաղաղության, իրավահավասար, գործընկերային հարաբերությունների կառուցման համար», - նշել է պետության ղեկավարը:

Պուտինը նաև հավելել է, որ այս տարի Ռուսաստանը նշում է Հայրենական մեծ պատերազմում տարած հաղթանակի 80-ամյակը։

«Այն թանկ է բոլոր նրանց համար, ովքեր պահպանում են հաղթողների սերնդի անմահ սխրանքի, նացիզմը ջախջախած, իրենց հայրենիքը պաշտպանած և Եվրոպայի ժողովուրդներին ստրկացումից փրկած իրական, իսկական հերոսների սուրբ հիշատակը», - ասել է նա: