Մեզ կտեսնեն իրենց առջև․ էրդողան
Թուրքիայի նախագահ Ռեջեփ Թայիփ Էրդողանն Անկարայում կառավարության նիստից հետո հայտարարությամբ է հանդես եկել։ Երկրի ղեկավարն իր ելույթում անդրադարձել է Սիրիայում տիրող իրավիճակին։ Նա նշել է հարևան երկրում տեղի ունեցող դրական գործընթացները և հավելել, որ Սիրիան չի վերադառնա դեկտեմբերի 8-ին նախորդող ժամանակաշրջանին։
«Դեկտեմբերի 8-ի հեղափոխությամբ սիրիացի ժողովուրդը կատարեց իր ընտրությունը և նոր էջ բացեց իր պատմության մեջ։ Սիրիայում նոր դարաշրջան է սկսվել»,- հայտարարել է Էրդողանը։
Նա ևս մեկ անգամ ընդգծել է Թուրքիայի դիրքորոշումը Սիրիայի տարածքային ամբողջականության և ինքնիշխանության պահպանման անհրաժեշտության վերաբերյալ։ Էրդողանը հիշեցրել է, որ Թուրքիան ոչնչացրել է Սիրիայի տարածքը բաժանելու ծրագրերը։
«Ինչպես մենք թույլ չտվեցինք, որ Սիրիան բաժանվի ահաբեկչության միջանցքներով, մենք թույլ չենք տա, որ այս երկիրը մասնատվի այլ նախագծերով»,- վստահեցրել է նա։
Լիակատար աջակցություն հայտնելով Սիրիայի նոր իշխանություններին՝ նա հավելել է, որ Անկարան կշարունակի Դամասկոսին ցուցաբերել անհրաժեշտ օգնություն՝ պետականության ամրապնդման համար։ Նա նախազգուշացրել է Սիրիայում կայունությունը խաթարել փորձող ուժերին:
«Նրանք, ովքեր փորձում են խանգարել Սիրիային հասնել կայուն խաղաղության և կայունության, մեզ կտեսնեն իրենց առջև՝ Սիրիայի կառավարության հետ միասին»,- ասել է Թուրքիայի նախագահը։
Նրա խոսքով՝ Սիրիան ապակայունացնելու փորձերը դատապարտված են ձախողման։
«Սիրիայի հետ կապված որոշ ուժեր պետք է գնահատեն մեր բարեկամությունը և իրենց պահեն որպես պետություն, ոչ թե հանցավոր կազմակերպություն և չփորձեն Թուրքիայի համբերությունը»,- ամփոփել է Ռեջեփ Թայիփ Էրդողանը։
