Պատժամիջոցների հզոր փաթեթ կսահմանենք նրանց դեմ․ Կալլաս

Եվրամիությունը պատրաստում է Ուկրաինայում հակամարտության պատճառով Ռուսաստանի դեմ պատժամիջոցների 17-րդ փաթեթը և նախատեսում է այն համաձայնեցնել մայիսին: Այս մասին հայտարարել է եվրոպական դիվանագիտության ղեկավար Կայա Կալասը Լյուքսեմբուրգում ԵՄ Խորհրդի նիստից հետո կայացած մամուլի ասուլիսի ժամանակ, հայտնում է «ՏԱՍՍ»-ը։

«Պարզ է, որ մենք աշխատում ենք պատժամիջոցների 17-րդ փաթեթի վրա, որը կներառի ստվերային նավատորմը և այլ տարրեր, որպեսզի մայիսին ընդգրկենք ԵՄ Խորհրդի օրակարգում»,- ասել է Կալլաս։

Լրագրողների այն հարցին, թե արդյոք պատժամիջոցների նոր փաթեթը կընդգրկի ՌԴ-ից հեղուկ բնական գազի մատակարարման արգելքը, Կալլասը պատասխանել է.

«Քննարկումներն ընթանում են հիմա, բայց դուք գիտեք, որ պատժամիջոցներ սահմանելու համար անհրաժեշտ է բոլոր 27 երկրների համաձայնությունը։ Բայց իմ կարծիքն այն է, որ անհրաժեշտ է պատժամիջոցների հնարավորինս հզոր փաթեթ մտցնել»,- հավելել է նա։

Հիշեցնենք նաև, որ Ռուսաստանի դեմ տնտեսական և անհատական պատժամիջոցների վերջին՝ 16-րդ փաթեթը Եվրամիության կողմից սահմանվել է 2025 թվականի փետրվարի 24-ին ։