Դատարանի որոշումը՝ Փաշինյանի վրա խնձոր նետած անձի վերաբերյալ

Վարչապետ Նիկոլ Փաշինյանի ուղղությամբ շենքի 9-րդ հարկից խնձոր նետած 71-ամյա Ալբերտ Առստամյանն արդարացվեց։ Նման որոշում կայացրեց Առաջին ատյանի ընդհանուր իրավասության դատարանը։

«Դատարանն ապացուցված չի համարում Ալբերտ Նիկոլայի Առստամյանին մեղսագրվող ՀՀ քրեական օրենսգրքի 297-րդ հոդվածի 1-ին մասով սահմանված հանցակազմի առկայությունը»,- հայտարարեց դատավորը՝ նշելով, որ, ըստ էության, արդարացման որոշում է կայացվել։

Առստամյանին մեղադրանք էր առաջադրվել խուլիգանություն կատարելու համար։ Տղամարդու նկատմամբ որպես խափանման միջոց էր կիրառվել բացակայելու արգելքը։

Հիշեցնեմ, որ Նիկոլ Փաշինյանը նախորդ տարվա օգոստոսին այցելել էր Երևանում գտնվող իր հարազատներից մեկի տուն, և բնակիչներից մեկը պատուհանից խնձոր էր նետել նրա ուղղությամբ: Ալբերտ Առստամյանն ավելի վաղ չէր հերքել՝ իններորդ հարկից խնձոր է նետել, բայց ոչ թե հենց իրենց բակում գտնվող վարչապետի վրա, այլ այդ ուղղությամբ։