ԱՄՆ-ն սկսում է «բարձր մակարդակի» բանակցություններ Իրանի հետ. Թրամփ

ԱՄՆ նախագահ Դոնալդ Թրամփը երկուշաբթի Սպիտակ տանը ընդունել է Իսրայելի վարչապետ Բինիամին Նեթանյահուին։ Դա նրանց երկրորդ հանդիպումն էր Սպիտակ տանը Թրամփի նախագահության չորս ամիսների ընթացքում։ Իսրայելի վարչապետը եղել է առաջինը, ում Թրամփը ընդունել է օվալաձև աշխատասենյակում` պաշտոնն ստանձնելուց հետո։

Հանդիպումից հետո լրագրողների հարցերին պատասխանելով՝ Թրամփը ասել է, որ երկու առաջնորդները «հրաշալի քննարկում» են ունեցել, որը վերաբերում էր Իրանի և միջազգային առևտրի թեմաներին։

Թրամփը նշել է, որ Միացյալ Նահանգները «ուղիղ բանակցություններ» կվարեն Իրանի հետ նրա միջուկային ծրագրի վերաբերյալ։ Նա ավելացրել է, որ  բանակցությունները սկսվելու են շաբաթ օրը և տեղի կունենան բարձր մակարդակով։