ԱՄՆ-ն Եվրոպային նախազգուշացրել է զենք չգնելու հետևանքները
Վաշինգտոնը նախազգուշացրել է եվրոպական երկրներին ամերիկյան արտադրության զենք գնելուց հրաժարվելու հետևանքների մասին: Այս մասին հայտնել է Reuters-ը:
Ինչպես նշվում է, վերջին շաբաթներին Վաշինգտոնից ստացված հաղորդագրություններում ասվել է, որ ԵՄ-ն քայլեր է ձեռնարկում խթանելու եվրոպական պաշտպանական արդյունաբերությունը՝ միաժամանակ սահմանափակելով ամերիկյան զենքի որոշակի տեսակների գնումները:
Սահմանափակվում է նաև ամերիկյան արտադրողների մասնակցությունը զենքի մրցույթներին:
ԱՄՆ պետքարտուղար Մարկո Ռուբիոն մարտի վերջին Լիտվայի, Լատվիայի և Էստոնիայի արտգործնախարարների հետ հանդիպման ժամանակ հայտարարել է, որ Միացյալ Նահանգները ցանկանում է շարունակել մասնակցել ԵՄ երկրների կողմից պաշտպանական գնումներին։
Նա զգուշացրել է, որ ամերիկյան ընկերությունների ցանկացած բացառում եվրոպական մրցույթներից բացասաբար կընկալվի Վաշինգտոնի կողմից։
Պետքարտուղարության բարձրաստիճան պաշտոնյան ասել է, որ Ռուբիոն ծրագրում է այդ հարցը քննարկել այս շաբաթ Բրյուսել կատարելիք այցի ընթացքում, որտեղ նա մասնակցելու է ՆԱՏՕ-ի արտգործնախարարների հանդիպմանը:
