Ուկրաինա խաղաղապահներ ուղարկելու առաջարկները անտեղին են. Սիյարտո

ԵՄ երկրների կողմից Ուկրաինա խաղաղապահներ ուղարկելու առաջարկները բացարձակապես անտեղին են և ժամանակավրեպ, քանի որ դրա համար դեռևս պայմաններ չկան։ Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ մեկնաբանելով ուկրաինական հակամարտության կարգավորման գործընթացը։

«Այս պահին առաջ քաշվող բոլոր եվրոպական գաղափարները լիովին անտեղին են, քանի որ խաղաղության պահպանման հարցը կարող է արդիական լինել միայն այն դեպքում, երբ կա խաղաղություն։

Պատերազմի ժամանակ խաղաղության պահպանման մասին խոսելը հիմարություն է։ Ուստի, պարզ չէ, թե երբ և ինչպես խաղաղապահներ ընդհանրապես կլինեն այնտեղ: Դրա համար նվազագույն պայմաններ չկան։ Ուստի, կարծում եմ, որ խաղաղապահների մասին անընդհատ խոսակցությունները պարզապես վկայում են եվրոպացիների՝ ինչ-որ կերպ արտահայտվելու ցանկության մասին, և դա կապ չունի իրերի իրական վիճակի հետ»,-ասել է արտգործնախարարը Ultrahang YouTube ալիքին տված հարցազրույցում և նշել, որ հիմա պետք է խաղաղություն կնքել, պայմանավորվել հրադադարի պայմանների շուրջ։