Դա կդառնա Մոլդովայի իշխանության «դագաղի վերջին մեխը». Իլան Շոր

Գագաուզիայի ղեկավար Եվգենյա Գուցուլի կալանավորումը կդառնա Մոլդովայի իշխանությունների «դագաղի վերջին մեխը»։ Այս մասին հայտարարել է ընդդիմադիր «Պոբեդա» դաշինքի առաջնորդ Իլան Շորը:

Քիշնևի շրջանային դատարանը մարտի 28–ին մասամբ բավարարել է դատախազների խնդրանքը և որոշում կայացրել Գուցուլին 20 օրով կալանավորելու մասին։ Պաշտպանության կողմը մտադիր է բողոքարկել այդ որոշումը։

«20 օր Եվգենի Գուցուլին։ Յուրաքանչյուր նման կալանավորում մեխ է կուսակցական դագաղի կափարիչին («Գործողություն և համերաշխություն» իշխող կուսակցություն– խմբ.): Սպասեք»,- գրել է Շորը Telegram-ի իր ալիքում։

Հիշեցնենք, որ Եվգենյա Գուցուլին ձերբակալել են Քիշնևի օդանավակայանում մարտի 25-ի երեկոյան: Քաղաքական գործչից վերցրել են անձնագիրը սահմանային հսկողություն անցնելու փորձի ժամանակ, իրականացրել են ամբողջական զննում և թույլ չեն տվել թռչել Ստամբուլ (միջազգային լրագրողական կոնգրեսին մասնակցելու), թեև նա ձեռքին հետադարձ տոմս է ունեցել դեպի Քիշնև։ Գուցուլը իրեն մեղավոր չի ճանաչել և դիմել է Ռուսաստանի և Թուրքիայի նախագահներ Վլադիմիր Պուտինին և Ռեջեփ Թայիփ Էրդողանին՝ խնդրելով ճնշում գործադրել Մոլդովայի իշխանությունների վրա՝ իրեն շուտափույթ ազատ արձակելու համար:

Գուցուլի ձերբակալությունը հասարակական լայն արձագանք է առաջացրել, Գագաուզիայի մայրաքաղաք Կոմրաթում անցկացվում են աջակցության ակցիաներ:

ՌԴ ԱԳՆ պաշտոնական ներկայացուցիչ Մարիա Զախարովան հույս ունի, որ Գուցուլի ձերբակալության գործում կպահպանվեն օրինականությունն ու ժողովրդավարական սկզբունքները: ՌԴ նախագահի մամուլի քարտուղար Դմիտրի Պեսկովը հայտարարել է, որ Քիշնևը պետք է հրաժարվի ճնշման մեթոդներից և ազատություն տա երկրի բոլոր քաղաքական ուժերին: