Նեթանյահուն` «Մոսադ»-ին գաղտնի հանձնարարական է տվել

Իսրայելի վարչապետ Բենիամին Նեթանյահուն Իսրայելի արտաքին հետախուզական գործակալությանը` «Մոսադ»-ին, հանձնարարել է գտնել այն երկրները, որոնք կհամաձայնեն ընդունել Գազայի հատվածից տեղահանվելիք մեծ թվով պաղեստինցիներին, հաղորդում է Axios-ը՝ վկայակոչելով իսրայելցի պաշտոնյաներին:

Նման բանակցություններ արդեն տեղի են ունեցել Սոմալիի, Հարավային Սուդանի, Ինդոնեզիայի և այլ երկրների հետ: Իսրայելցի պաշտոնյաների խոսքով՝ Նեթանյահուն «Մոսադ»-ին գաղտնի հանձնարարականը տվել է մի քանի շաբաթ առաջ։ Իսրայելի վարչապետի աշխատակազմում հրաժարվել են մեկնաբանություններից:

Ավելի վաղ ԱՄՆ նախագահ Դոնալդ Թրամփն առաջարկել էր Գազայի հատվածից տեղահանել երկու միլիոն պաղեստինցիներին՝ ռազմական գործողություններից ավերված անկլավը վերականգնելու համար: Առաջարկին կողմ է արտահայտվել Նեթանյահուն, որն ուղիներ է փնտրում մեծ թվով պաղեստինցիների հազարավոր կիլոմետրեր հեռավորության վրա գտնվող երկրներ տեղափոխելու համար: