Սա մեծ խնդիր է, և այն ավելի կմեծանա. Վենս
ԱՄՆ փոխնախագահ Ջ.Դ.Վենսը ուրբաթ ժամանել է Գրենլանդիայում գտնվող ամերիկյան ռազմաբազա, հայտնում է Associated Press-ը։
Ամերիկյան պատվիրակությանը տեղափոխող ինքնաթիռի վայրէջքից անմիջապես հետո Վենսը կնոջ հետ գնացել է զրուցելու զինվորականների հետ։ Համատեղ ճաշի ժամանակ փոխնախագահը նշել է, որ ինքը «շատ շահագրգռված է Արկտիկայի անվտանգությամբ»։
«Ինչպես գիտեք, սա մեծ խնդիր է, և առաջիկա տասնամյակներում այն միայն կմեծանա»,- ասել է նա։
Պատվիրակության կազմում են, մասնավորապես, ԱՄՆ ազգային անվտանգության հարցերով խորհրդական Մայք Ուոլցը և ԱՄՆ էներգետիկայի նախարար Քրիս Ռայթը։
Ավելի վաղ թե՛ կղզին, թե՛ Դանիան, որին պատկանում է, առաջիկա այցը համարել էին ԱՄՆ-ի կողմից ճնշում։
Այս տարի ԱՄՆ նախագահ Դոնալդ Թրամփը Կոնգրեսին ուղղված ուղերձում ասել է, որ մտադիր չէ հրաժարվել Գրենլանդիայի նկատմամբ իր տարածքային հավակնություններից։ Նա նշել է, որ ԱՄՆ-ը կհամաձայնի կղզին ընդունել իր տարածքում, եթե նրա բնակիչները նման ցանկություն հայտնեն։
