Ադրբեջանի կողմից այս ամենը խաբկանք է․ Օհանյան
Հայաստանի իշխանությունները ցանկանում են գնալ խաղաղության, գիտակցելով, որ Ադրբեջանը միայն ցանկանում է կորզել, իրական խաղաղություն Ադրբեջանը չի ձգտում։ Այս մասին լրագրողների հետ զրույցում հայտարարել է «Հայաստան» խմբակցության պատգամավոր Սեյրան Օհանյանը։
«Ճիշտ է, որ պետք է գնալ խաղաղության, մենք էլ ենք ձգտում խաղաղության, առավել ևս որպես զինվորական կարող եմ ասել, որ ո՞վ է ավելի շատ ուզում խաղաղություն, եթե ոչ այն կառույցը, որը կարող է առաջինը տուժել պատերազմական իրավիճակում։ Ադրբեջանի կողմից այս ամենը խաբկանք է, որովհետև իրենք խաղաղության պայմանագրի մեջ այնպիսի կետեր են դրել, որոնք ցույց են տալիս, որ անընդհատ շարունակական ճնշումներ կան Հայաստանի նկատմամբ՝ նոր պահանջներ ներկայացնելով: Առավել ևս, երբ դրանք զուգորդվում են նաև կրակոցներով սահմանին, ցույց են տալիս, որ իրական չէ խաղաղությունը, որի մասին իրենք խոսում են»,- ասել է նա:
Պատգամավորը հավելեց նաև, որ Ադրբեջանի փորձում է խաղաղության պայմանագրի կնքումը ձգձգել, որովհետև իր նպատակներն ունի։
«Ադրբեջանի կողմից խաղաղության պայմանագրի ձգձգումը կայանում է նրանում , որ իրենք փորձում են միջազգային իրավական հիմքեր ստեղծել հետագայում օգտվելու աշխարհաքաղաքական զարգացումներից և ուժային կենտրոնների միջև եղած հարաբերություններից։ Ադրբեջանի իշխանություններին լավ իմանալով կասեմ՝ այն խաղաղությունը, որին Ադրբեջանը ձգտում է, իրական չէ»,- նշեց պատգամավորը։
