Վրաստանի խոշորագույն ընդդիմադիր հեռուստաալիքը դադարեցրել է հեռարձակումը

Վրաստանի խոշորագույն ընդդիմադիր «Մտավարի արխի» հեռուստաալիքը դադարեցրել է հեռարձակումը: 

Հեռուստաընկերությունում հայտարարել են, որ որոշումը կայացվել է այն պատճառով, որ հեռուստաալիքի հիմնադիրներից Զազա Օկուաշվիլին արհեստականորեն ֆինանսական ճգնաժամ է ստեղծել:

«Մենք աշխատում ենք, որպեսզի միջոցներ գտնենք եթերը վերականգնելու համար»,- ասվում է հեռուստաալիքի հայտարարության մեջ:

Ավելի վաղ «Մտավարի արխիի» տնօրեն Գեորգի Գաբունիան հայտարարել էր, որ հեռուստաալիքի համահիմնադիր Զազա Օկուաշվիլին տնօրեններից մեկի՝ Գոգի Քուրդաձեի միջոցով արգելափակում է ֆինանսական գործարքները և հրաժարվում է ընկերության համար կարևոր գովազդային պայմանագրերի ձևակերպումից, ինչը վկայում է ԶԼՄ-ն փակելու նրա ձգտման մասին:

Հիշեցնենք, որ ընդդիմադիր «Մտավարի արխի» հեռուստաալիքը 2019 թվականին հիմնադրել է Վրաստանի նախագահ Միխեիլ Սաակաշվիլիի նախկին զինակից, ներկայում՝ ընդդիմադիր «Ախալի» կուսակցության առաջնորդ Նիկա Գվարամիան: 2024 թվականին Գվարամիան հրաժարվեց հեռուստաալիքի գլխավոր տնօրենի պաշտոնից, երբ որոշեց զբաղվել քաղաքականությամբ։