Ստեփանավանի հրդեհի հետևանքները վերացնելու նպատակով օպերատիվ շտաբ է ստեղծվել

Ստեփանավան համայնքի՝  Աշոտաբերդ թաղամասում տեղի ունեցած հրդեհի հետևանքների վերացման համար այսօր՝ փետրվարի 8-ին, համայնքապետարանում տեղի է ունեցել խորհրդակցություն, որոշում է կայացվել ստեղծել օպերատիվ շտաբ: Այն ղեկավարելու է ՏԿԵ նախարար Դավիթ Խուդաթյանը:

Նշվել է, որ տարհանված քաղաքացիներից 29-ը տեղավորվել է հյուրանոցներում, 13-ը՝ հարազատների բնակարաններում: Նրանցից 6-ը անչափահասներ են։

Բոլոր ընտանիքներն ապահովված են սննդով և հիգիենիկ անհրաժեշտ պարագաներով, ըստ անհրաժեշտության՝ նաև դեղորայքով։

Հրդեհից զոհվել է մեկ մարդ։ Բուժօգնության է դիմել 8 քաղաքացի, որից 3-ը տեղափոխվել են Երևան, 1 անձ բուժում է ստանում Ստեփանավանի ԲԿ-ում։ Մյուս քաղաքացիները ստացել են առաջին բուժօգնությունն ու դուրս գրվել հիվանդանոցից։