Սիմոնյանը՝ սահմանին հնարավոր ռազմական գործողությունների մասին

Նման նախագիծ ներկայացնելը քաղաքացիների կամքով է եղել, և ԱԺ-ն քննարկելու է այն։ Այս մասին հայտարարել է ԱԺ նախագահ Ալեն Սիմոնյանն՝ անդրադառնալով ԵՄ-ին անդամակցելու վերաբերյալ օրինագծին։

«Ո՞վ ասաց, թե մենք կողմ ենք քվեարկելու»,- ասել է Սիմոնյանը՝ լրագրողի հարցին ի պատասխան։

Անդրադառնալով ռուսական կողմի մտահոգություններին՝ նա նշել է. «Չեմ կարծում, որ համագործակցությունը որևէ ձևով համատեղելը կարող է խնդիր հանդիսանալ»։

Սիմոնյանի խոսքով՝ կարելի է քննարկել հարցերը և գտնել լուծումներ։

 «ԵԱՏՄ-ն ՀՀ-ին տնտեսական առումով ձեռնտու կառույց է, և մենք որևէ միտում չունենք ԵԱՏՄ-ն լքելու և ուզում ենք շարունակել»,- հավելել է նա։

Խոսելով սահմանին հնարավոր ռազմական գործողությունների մասին՝ ԱԺ նախագահը նշել է, որ ԵՄ դիտորդների ներկայությունը զսպում է Ադրբեջանին։

«Մի բան է՝ հարձակում գործել ՀԱՊԿ-ի անդամ երկրի վրա, մի բան՝ ԵՄ անդամակցության հայտ ներկայացրած, ԵՄ ժողովրդավարության արժեքները կիսող, բարձր ժողովրդավարության մակարդակ ունեցող երկրի վրա։ Դրանք տարբեր իրականություններ են»,- ասել է Սիմոնյանը և հույս հայտնել, որ ԵՄ դիտորդների տեղակայման ժամկետները կերկարացվեն։