Ճիշտը Ղարաբաղ ձևակերպումն է, բոլորս էլ սխալվում ենք․ Սիմոնյան

ԱԺ նախագահ Ալեն Սիմոնյանն անդրադարձել է Արցախի նախկին ղեկավարության դատավարությանը։

Սիմոնյանի խոսքով՝ հետևում են գործընթացներին։

«Հույս ունենք, որ դատավարությունը ավարտից հետո հնարավորություն կլինի այդ մարդկանց ինչ-որ ձևով ետ բերելու և ազատելու քննարկում ունենալ»,- ասել է ԱԺ նախագահը։

Նա նաև նշել է՝ ճիշտը «Ղարաբաղ» ձեւակերպումն օգտագործելն է: 

Հիշեցմանը, որ ժամանակին ինքը Աղդամն իր հայրենիքն էր համարում, ԱԺ նախագահն ասել է. «Բոլորս էլ սխալվում ենք, էլի հարցեր ունե՞ք»:

Հարցին՝ Նիկոլ Փաշինյանն էլ էր սխալվում, երբ ասում էր, որ Արցախը Հայաստան է եւ վերջ, եւ այդ սխալը մեզ բերեց Արցախի կորուստ ու 5 հազար զոհ, նա պատասխանեց. «Ո՞վ ասաց, որ 5 հազար զոհ է, 4000-ից պակաս է: Իսկ ինչո՞ւ, երբ թիվ եք ավելացնում, չեք ասում, որ Նիկոլ Փաշինյանի շնորհիվ 25 հազար մարդ շրջափակումից խուսափեց, որ 25 հազար մարդ հետ վերադարձավ իր ընտանիք: Եթե այդպիսի մարդիկ կան, որ սիրում են թիվ ավելացնել, թող 25 հազարի փոխարեն ասեն 55 հազար: Ինչ վերաբերում է սխալներին, վարչապետը դրա մասին ասել է, եւ մեր մտածելակերպի մեջ, մեր իրականության մեջ մենք բոլորս այլ պատկերացում ենք ունեցել, այդ թվում ես, եւ ինքը»: