Սիրիայի ՊՆ ղեկավար է նշանակվել Հայաթ Թահրիր ալ-Շամ»–ի ռազմական թևի հրամանատարը

Սիրիայում ձևավորված անցումային կառավարությունում երկրի պաշտպանության նախարարության ղեկավար է նշանակվել Մուրհաֆ Աբու Կասրան։ Այս մասին հայտնում է երկրի Suria հեռուստաալիքը:

Պաշտպանության գերատեսչության նոր ղեկավարը հայտնի է նաև Աբու ալ Հասան ալ Համավի մականունով:

Ըստ սիրիական «Ալ Վաթան» հրատարակության՝ Աբու Կասրան ծառայել է որպես «Հայաթ Թահրիր ալ-Շամ» խմբավորման ռազմական թևի հրամանատար, որը ամսվա սկզբին վերահսկողության տակ է վերցրել երկրի ամենամեծ քաղաքները, ներառյալ Դամասկոսը, և տապալել է նախագահ Բաշար ալ Ասադի ռեժիմը:

Ավելի վաղ Դամասկոսի նոր իշխանությունների ղեկավար Ահմեդ ալ-Շարաան, ով հայտնի է նաև Աբու Մուհամեդ ալ-Ջուլանի մականունով, հայտարարել էր, որ սիրիական տարբեր զինված խմբավորումներ կմիավորվեն մեկ կառույցում՝ երկրի պաշտպանության նախարարության վերահսկողության ներքո։