ՀՀ փոխվարչապետը դեմ է ՌԴ-ի և ԵԱՏՄ-ի նկատմամբ կտրուկ քայլերին

ՀՀ փոխվարչապետ Մհեր Գրիգորյանը կոչ է անում երկրի պարենային և էներգետիկ անվտանգության ոլորտների դիվերսիֆիկացման հարցում խուսափել կտրուկ քայլերից:

Արձագանքելով քաղաքականության կողմնակիցների ելույթներին՝ փոխվարչապետը նշել է, որ կտրուկ որոշումներ կայացնելուց առաջ անհրաժեշտ է մանրակրկիտ գնահատել դրանց հետևանքները:

«Եթե էներգառեսուրսների կամ պարենամթերքի մատակարարումները դիտարկենք գլոբալ գործընթացներից առանձին վերցված, ապա կարող է թվալ, որ այս կամ այն ապրանքատեսակների գծով իրավիճակը կառավարելի է։ Բայց եթե հաշվի առնենք տրանսպորտային և լոգիստիկ ասպեկտները, պատկերը շատ ավելի բարդ է դառնում», - նշել է Գրիգորյանը։

Փոխվարչապետը հիշեցրել է, որ ուկրաինական իրադարձություններից առաջ ցորենը համեմատաբար մատչելի էր, սակայն Հայաստանի համար գլխավոր խնդիրը լոգիստիկան էր։

«Նույն խնդիրները բնորոշ են նաև էներգառեսուրսներին։ Ապրանքը կարող է հասանելի լինել համաշխարհային շուկայում, սակայն լոգիստիկ ռիսկերը ոչ միայն բարձրացնում են դրա արժեքը, այլ առանձին դեպքերում ֆիզիկապես անհնար են դարձնում մատակարարումները», - պարզաբանեց Գրիգորյանը։

Խոսելով տարածաշրջանի գազային ենթակառուցվածքի մասին՝ նա նշեց, որ էներգետիկ ռիսկերի կառավարումը պահանջում է հաշվի առնել ոչ միայն ապրանքի առկայությունն ու գինը, այլև մատակարարման իրական հնարավորությունները:

«Որոշ դեպքերում այդ հնարավորությունները խիստ սահմանափակ են։ Այդ իսկ պատճառով «Խաղաղության խաչմերուկ» նախագիծն առանցքային նշանակություն ունի ռիսկերի նվազեցման և ավելի կայուն տնտեսական կապերի ստեղծման համար»,- հավելեց նա։

Նշենք, որ վերջին շրջանում իշխող թիմի որոշ ներկայացուցիչներ խոսում են էներգառեսուրսների և պարենամթերքի մատակարարումների «դիվերսիֆիկացման» անհրաժեշտության մասին։ Այս համատեքստում ակնարկներ են հնչում, այդ թվում՝ ապագայում ադրբեջանական գազ գնելու հնարավորության մասին։ Իսկ ԱԽ քարտուղար Արմեն Գրիգորյանն ընդհանրապես հայտարարում է ցորենից դեպի բրնձի անցնելու անհրաժեշտության մասին։ Եվ պատճառն այն է, որ հացահատիկի ավելի քան 90%-ը Հայաստանը ներմուծում է Ռուսաստանից՝ սեփական արտադրության հաշվին ապահովելով իր կարիքների միայն մեկ երրորդը։