Ինքնահրկիզման փորձ, արցունքաբեր գազ․ Խորենացու փողոցում գտնվող հայտնի մսի խանութներից ձերբակալվածներ կան

Երևանի «Գումի» շուկայում աշխատող մսավաճառներից 8-ը ձերբակալվել են։ Այս մասին Auroranews-ին հայտնեց ՆԳՆ մամուլի խոսնակ Նարեկ Սարգսյանը։

«ՍԱՏՄ աշխատակիցների և հավաքված քաղաքացիների միջև առաջացած վիճաբանության ընթացքում քաղաքացիներից մեկը բենզին է լցրել իր վրա և փորձել ինքնահրկիզվել, որը կանխվել է ոստիկանների կողմից։ Միջադեպի մասնակից ևս յոթ անձ խուլիգանության և դիտավորությամբ գույքը վնասելու անմիջական կասկածանքով ձերբակալվել, տեղափոխվել է ոստիկանություն»,-ասաց Սարգսյանը։

Նրա խոսքով` ձերբակալվածների վերաբերյալ կազմվում են համապատասխան փաստաթղթեր նախաքննական մարմին ներկայացնելու համար։

Հիշեցնենք`  վաղ առավոտից լարված իրավիճակ էր «Գումի» շուկայում, քանի որ Սննդամթերքի անվտանգության տեսչական մարմնի աշխատակիցները ոստիկանների ուղեկցությամբ շուկայում փորձում էին առգրավել մսավաճառների միսը` հիմնավորելով, որ այն վաճառվում է նորմերի խախտումներով։ Երբ մսավաճառներն ընդվզեցին, բախում առաջացավ նրանց և ոստիկանների միջև: Կարմիրբերետավորները կիրառել են արցունքաբեր գազ, մսավաճառներից մեկի վիճակը կտրուկ վատացել է, նրան տեղում քաղաքացիներն օգնություն են ցուցաբերել։

Հավելենք, որ 2023թ–ի դեկտեմբերի 6-ից Հայաստանում ուժի մեջ է մտել սպանդանոցային մորթի պարտադիր պահանջն ամրագրող օրենքը, որի համաձայն` մեր երկրում արգելվում է ոչ սպանդանոցային մորթի արդյունքում ստացված կենդանական ծագման ցանկացած հումքի և մթերքի իրացումը։ Իսկ շուկայում առանց համապատասխան հավատագրի վաճառվող միսը պետք է առգրավվի ու ոչնչացվի։