Անհայտ ԱԹՍ–ներ են նկատվել Գերմանիայի ամերիկյան ավիաբազայի օդային տարածքում

Անհայտ անօդաչու թռչող սարքեր են նկատվել Գերմանիայի մի շարք արդյունաբերական վայրերի և Գերմանիայում գտնվող ԱՄՆ Ռամշտայն ավիաբազայայի օդային տարածքում: Այսպիսի հայտարարություն է արել Der Spiegel ամսագիրը։

Գերմանական անվտանգության մարմինների գաղտնի զեկույցի համաձայն՝ դեկտեմբերի 3-ի և 4-ի երեկոյան բազմաթիվ անօդաչու սարքեր են նկատվել ամերիկյան խոշոր ռազմաբազայի մոտակայքում։ Չնայած ինտենսիվ որոնողական աշխատանքներին, ոչ մի անօդաչու թռչող սարք գտնել չի հաջողվել, նշում է ամսագիրը։

Ըստ Der Spiegel-ի՝ վերջին շաբաթներին անօդաչու սարքեր են նկատվել նաև գերմանական զենք արտադրող պաշտպանական ընկերության և քիմիական հսկային պատկանող օբյեկտների օդային տարածքում, սակայն դրանց ծագումը չի հաջողվել պարզել։

Գերմանիայի պաշտպանության նախարարության ներկայացուցիչը ճեպազրույցում չի մեկնաբանել այս տեղեկությունը։