Թրամփը կողմ չէ, որ Ուկրաինան անդամակցի ՆԱՏՕ-ին

ԱՄՆ նախագահական ընտրությունների հաղթող Դոնալդ Թրամփը Վլադիմիր Զելենսկիին և Ֆրանսիայի առաջնորդ Էմանուել Մակրոնին ասել է, որ չի աջակցում ՆԱՏՕ-ին Ուկրաինայի անդամակցությանը, և Եվրոպան պետք է մեծ դեր խաղա Կիևին աջակցելու գործում, գրում է Wall Street Journal-ը՝ վկայակոչելով պաշտոնյաներին։

Ավելի վաղ Ելիսեյան պալատում տեղի է ունեցել Թրամփի, Մակրոնի և Զելենսկու եռակողմ հանդիպումը։ Թրամփն ու Մակրոնը նախ երկկողմանի բանակցություններ են վարել: 

Թրամփը նաև նշել է, որ Եվրոպան պետք է մեծ դեր խաղա Ուկրաինայի պաշտպանության և աջակցության գործում։

«Ես ցանկանում եմ, որ եվրոպական զորքերը ներկա լինեն Ուկրաինայում՝ վերահսկելու հրադադարի պահպանումը: Չեմ բացառում ԱՄՆ-ի աջակցությունը համաձայնագրին, բայց ամերիկյան զորքերը չեն ներգրավվի», - ասել է Թրամփը` նշում է թերթը։

Նշվում է, որ Թրամփը նաև դրդում է եվրոպացիներին ավելի ակտիվորեն ազդել Չինաստանի վրա, որպեսզի նա ստիպի Ռուսաստանին դադարեցնել հակամարտությունը։ Նա և իր եվրոպացի գործընկերները քննարկել են մաքսատուրքերի օգտագործումը որպես Պեկինի վրա ճնշման լծակ, պարզաբանում է հրատարակությունը։

Թրամփը ավելի վաղ խոստացել էր, որ կկարողանա հասնել ուկրաինական հակամարտության բանակցային կարգավորմանը։ Նա բազմիցս հայտարարել է, որ կկարողանա մեկ օրում լուծել ուկրաինական հակամարտությունը։ Ռուսաստանի Դաշնությունը կարծում է, որ դա չափազանց բարդ խնդիր է նման պարզ լուծման համար։