Սիրիայի գրոհայինների ղեկավարը հայտնել է, թե որն է իրենց նպատակը
Մի շարք երկրներում ահաբեկչական ճանաչված «Հայաթ Թահրիր աշ-Շամ» խմբավորման ղեկավար Աբու Մոհամմադ ալ Ջոլանին բացառիկ հարցազրույց է տվել CNN-ին՝ հայտնելով, որ գրոհայինների նպատակն է տապալել Սիրիայի նախագահ Բաշար ալ Ասադի վարչակարգը։ Այս մասին հանյտնում է CNN-ը:
Ջոլանին հայտնել է նաև, որ իրենք ծրագրում են ստեղծել կառավարություն՝ հիմնված ինստիտուտների և «ժողովրդի կողմից ընտրված խորհրդի» վրա։
«Երբ խոսում ենք նպատակների մասին, հեղափոխության նպատակը մնում է այս ռեժիմի տապալումը։ Մեր իրավունքն է օգտագործել բոլոր առկա միջոցները այդ նպատակին հասնելու համար։ Ռեժիմի պարտության սերմերը միշտ եղել են նրա ներսում… Իրանցիները փորձեցին վերակենդանացնել ռեժիմը՝ ժամանակ շահելով, իսկ ավելի ուշ ռուսները նույնպես փորձեցին աջակցել նրան: Բայց ճշմարտությունը մնում է նույնը՝ այս ռեժիմը մեռած է», - ասել է «Հայաթ Թահրիր Ալ-Շամ»-ի ղեկավարը։
Նոյեմբերի 27-ին իրենց վերահսկողության տակ գտնվող հատվածներից դուրս գալուց հետո գրոհայինները գրավել են Սիրիայի՝ մեծությամբ երկրորդ քաղաք Հալեպը, այնուհետև նաև Համան և առաջ են շարժվում դեպի երկրի հարավ։
