Որ դեպքում գերմանացի զինծառայողները կարող են ուղարկվել Ուկրաինա

Գերմանացի զինծառայողները կարող են ուղարկվել Ուկրաինա՝ հրադադարի դեպքում խաղաղություն ապահովելու նպատակով։ Այս մասին հայտարարել է Գերմանիայի ԱԳ նախարարը, փոխանցում է Die Welt-ը։

«Ուկրաինայի և Ռուսաստանի միջև հրադադարի դեպքում գերմանացի զինվորները նույնպես կարող են ներգրավվել խաղաղության ապահովման համար», -ընդգծել Է Գերմանիայի արտաքին քաղաքական գերատեսչության ղեկավարը:

Մինչ այդ Ուկրաինայի նախագահ Վլադիմիր Զելենսկին Կիև ժամանած եվրահանձնակատարների հետ հանդիպման ժամանակ ասել էր, որ եթե բարձրացնի Ուկրաինայի հակամարտության գոտում օտարերկրյա զինված ուժերի հարցը, երկիրը կզրկվի իր դաշնակիցների կեսից։

Միևնույն ժամանակ, ՄԱԿ-ում ֆրանսիական ռազմական առաքելության նախկին ղեկավար, գեներալ Տրինկվանը հարցազրույցներից մեկում հայտարարել է, որ արևմտյան զինվորականները կարող են տեղակայվել հիպոթետիկ սառեցված ճակատային գծում՝ Ուկրաինայի անվտանգությունն ապահովելու համար:

Ավելի վաղ Գերմանիայի ղեկավարը նշել էր Ուկրաինայում հակամարտության սառեցման մասին խոսակցությունների առաջացման պատճառը: