Ինչ է կատարվում Վերին Լարսում․ մանրամասներ

Մոտ 600 հայկական բեռնատար կա այս պահին Վերին Լարսում կանգնած ռուսական կողմից, իսկ վրացական կողմից՝ դեպի Ռուսաստան ուղղությամբ, 300 հայկական բեռնատար: Այս մասին Auroranews-ին հայտնեց ՌԴ–ում ՀՀ դեսպանատան մաքսային կցորդ Վահան Հակոբյանը։

Նրա խոսքով՝ մարդատար մեքենաների հերթը հասնում է մոտ 2 կմ-ի։

«Մեր քաղաքացիներին, ցավոք սրտի, ոչնչով օգնելու լիազորություն և հնարավորություն չունեմ, ես աշխատում եմ ռուսական և վրացական կողմի հետ այս պահին, ու փորձում ենք հնարավորինս ամեն բան անել, որ մի րոպե շուտ հարցերը կարողանանք լուծել։ Իմ գործառույթը մաքսային է, ես զբաղվում եմ մաքսային հարցերով։ Ռուսական ԱԻՆ-ը տեղում օգնություն է ցուցաբերում բոլորին, էնտեղ տաք թեյ են տալիս, կերակրում են, լիցքավորում են հեռախոսները, տաքացնում են ժողովրդին»,- նշեց Հակոբյանը։

Նրա խոսքով՝ այս պահի դրությամբ վրացական կողմն արդեն սկսել է ձնամաքրման աշխատանքները, և հույս կա, որ օրվա ընթացքում մարդատար մեքենաների համար երթևեկությունը կվերականգնվի, հավանական է, որ մինչև օրվա վերջ կամ վաղը նաև բեռնատարների համար կվերականգնվի։

Հիշեցնենք՝ ավելի վաղ հայտնել էինք, որ Վերին Լարսի անցակետում խայտառակ վիճակ է, հարյուրավոր հայեր օրեր շարունակ նույն կետում կանգնած սպասում են, որ կարողանան գալ դեպի Հայաստան, երեխաներին հիվանդանոց են տեղափոխել։