Բժիշկները մոտ 2 ժամ չեն աշխատել, իրավիճակը կարող է ավելի սրվել․ ինչ է կատարվում Արտաշատի ԲԿ-ում

Արտաշատի հիվանդանոցում լարված իրավիճակ է, որը կարող է էլ ավելի սրվել, մոտ 500-600 մլն դրամի աշխատավարձ չի վճարվել, այսօր բժիշկները մոտ 2 ժամ չեն աշխատել, սպասում են Առողջապահության նախարարին, Արարատի մարզպետին, սակայն նրանք չեն գալիս: Ինչ վերաբերում է մարզպետարանի առողջապահության վարչության պետին, ապա նա արձակուրդ է մեկնել: Auroranews-ն է այսօր այս ահազանգը ստացել Արտաշատի ԲԿ-ից:

Auroranews-ը կապ է հաստատել Առողջապահության նախարարություն, որտեղից մեզ փոխանցեցին. «Արտաշատի բժշկական կենտրոնի շուրջ ստեղծված ճգնաժամը նոր չէ, այնտեղ կան ֆինանսական և կառավարչական խնդիրներ, որին նախարարը ծանոթ է»:

Նախարարությունից նաև հայտնեցին, որ իրենց գերատեսչությունը Արտաշատի ԲԿ-ին աշխատավարձ չի տալիս, նախարարությունից նրանք ստանում են պետպատվեր և իրենց ծառայությունների համար գումար:

«Իրականացրել ենք մի քանի այց: Վերջինը` երկու օր առաջ էր, ստեղծվել է ճգնաժամային կառավարում իրականացնող մասնագիտական հանձնաժողով` լուծումներ գտնելու համար։ Առողջապահության նախարարությունն այս հարցով դիմել է Դատախազություն: Նախարար Անահիտ Ավանեսյանը նախատեսում է Արտաշատի բժշկական կենտրոնի բժիշկների հետ առանձին հանդիպում: Իսկ թե ինչու է Արարատի մարզի առողջապահության վարչության պետն այս դժվարին պահին մեկնել արձակուրդ, ցավոք, չենք կարող մեկնաբանել»,- ասաց ԱՆ մամուլի խոսնակ Մարիամ Ծատրյանը: