ՏԵՍԱՆՅՈՒԹ․ Հարյուրավոր հայեր մնացել են Լարսում․ երեխաներին հիվանդանոց են տեղափոխել
Վերին Լարսի անցակետում խայտառակ վիճակ է․ հարյուրավոր հայեր օրեր շարունակ նույն կետում կանգնած սպասում են, որ կարողանան գալ դեպի Հայաստան։ Այս մասին հայտնում է MediaHub-ը։
«Երեք օր է՝ այստեղ կանգնած ենք, ցուրտ է, մարդիկ էլ չեն դիմանում։ Անմարդկային վիճակ է, մեքենաների վառելիքը վերջացել է, մեր մոտի գումարն էլ է վերջանում, արդեն ուտելիք գնելու հնարավորություն էլ չունենք»,- լրատվամիջոցի հետ զրույցում ասել է քաղաքացիներից մեկը, որը ՌԴ-ից յոթ տեղանոց մեքենայով գալիս է դեպի Հայաստան։
Նրա խոսքով՝ իրենց հետ կանայք կան, երեխաներ։
«Երեկ երկու երեխայի տարել են հիվանդանոց, մրսել, հիվանդացել են։ Մենք էլ չգիտենք՝ ինչ անել։ Որևէ արձագանք Հայաստանից չկա։ Կցորդն էլ չի կապվել մեզ հետ։ Չգիտենք՝ ինչ անել»,- նշել է նա։
Լրատվամիջոցի զրուցակիցը նաև պատմել է, որ անգամ զուգարանից օգտվելու հնարավորությունից են շուտով զրկվելու, քանի որ դրա համար էլ պիտի վճարեն, սակայն արդեն գումար չունեն։
«Ու մեզ ուղղակի նյարդայնացնում է, որ հայկական կողմը հայտարարում է, թե Լարսը բաց է, խնդիր չկա։ Մեր հարազատներն էլ զանգում են, զարմանում, թե ոնց չենք հասնում, եթե պաշտոնապես հայտարարվում է, որ ճանապարհը բաց է»,- նշել է զրուցակիցը։
Նրա խոսքով՝ այս պահին էլ է ձյուն տեղում, և իրենց ասում են, որ եղանակային անոմալ պայմաններից ելնելով, ուղղակի պիտի սպասեն։
