Նոր մանրամասներ Եգիպտոսի ափերի մոտ խորտակված զբոսանավից
Եգիպտոսում 28 մարդու են փրկել Sea Story զբոսանավից, որը խորտակվել է Կարմիր ծովի Մարսա Ալամ քաղաքի ափերի մոտ։ Այս պահին 17 մարդ համարվում է անհետ կորած, նրանց որոնումները շարունակվում են, ասել է նահանգապետ Ամր Հանաֆին։
«Այժմ 28 մարդ հաջողությամբ փրկվել է Մարսա Ալամ քաղաքից հարավ գտնվող Sea Story զբոսանավի խորտակման միջադեպից, որոնումները շարունակվում են 17 անհետ կորածների համար»,- ասվում է նահանգային կառավարության հայտարարության մեջ։
Հավանականություն կա, որ փրկվածների մի մասին վերցրել է որոնողափրկարարական ինքնաթիռը: Մյուսներին փրկելու համար ուղարկվել է ֆրեգատ։
Հիշեցնենք, որ դեպքը տեղի է ունեցել նոյեմբերի 25-ի վաղ առավոտյան։ Նավի վրա եղել է անձնակազմի 14 անդամ և 31 զբոսաշրջիկ։ ՀՀ ԱԳՆ-ի հաղորդմամբ զբոսանավում հայեր չեն եղել։
