Մեր ադրբեջանցի եղբայրները կորոշեն. Թուրքիայի տրանսպորտի նախարար

Թե որտեղով կանցնի «Զանգեզուրի» միջանցքը՝ հայկական, թե իրանական կողմով, կորոշեն մեր ադրբեջանցի եղբայրները։ Այս մասին ասել է Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն COP29-ում «Կայուն, թվային Միջին միջանցք և ոչ միայն» թեմայով քննարկման ժամանակ:

«Այս ուղղությամբ մենք օպերատիվ կերպով շարունակում ենք գործընթացները ադրբեջանական կողմի հետ։ Հաջորդիվ այս միջանցքը Նախիջևանով կանցնի Թուրքիա»,- ընդգծել է նախարարը:

Նախարարն ընդգծել է, որ Թուրքիան ակտիվորեն աշխատում է «Զանգեզուրով» առանձին երթուղի ստեղծելու ուղղությամբ՝ Ադրբեջանի հետ Միջին միջանցքով բեռնափոխադրումների իրականացման համար:

«Թուրքիայում մենք ավարտել ենք մեր նախագիծը, անցկացրել ենք մրցույթ, մոտ օրերս կսկսենք շինարարական աշխատանքները և ուղիղ տրանսպորտային կապ կապահովենք Թուրքիայի և Ադրբեջանի միջև»,- ասել է թուրք պաշտոնյան:

Ըստ Ուրալօղլուի՝ Թուրքիան գտնվում է տրանսպորտային միջանցքների կենտրոնում և առանցքային դեր է խաղում միջմայրցամաքային միջանցքների արդյունավետ օգտագործման գործում։