Մենք պետք է այդ որոշումը կայացնենք՝ դրա հետ համաձայն չլինելով. վարչապետ

Ես եկել եմ որոշման, որ մենք այդ երկու տարվա սահմանափակումը չենք կիրառի՝ ինքս համաձայն չլինելով դրա հետ: Այս մասին այսօր՝ նոյեմբերի 13-ին, ԱԺ-ում կառավարության հետ հարցուպատասխանի ժամանակ նշեց ՀՀ վարչապետ Նիկոլ Փաշինյանը՝ անդրադառնալով նրան, որ նախապես հայտարարվել էր, որ հունվարի 1-ից էլեկտրամոբիլ ներկրելու դեպքում մաքսատուրք չի կիրառվի միայն վեռրջին երկու տարիներին արտադրված մեքենաներ ներմուծելու դեպքում:

«Ես այս որոշումը կայացրեցի, որովհետեւ կարծում եմ, որ մեր պետական մարմինները ճիշտ չեն կոմունիկացրել հարցը եւ միայն այդ պատճառով մենք պետք է այդ որոշումը կայացնենք՝ դրա հետ հմաձայն չլինելով:

Մենք պետք է նաեւ արձանագրենք, որ 2025-ի քվոտաները բաժանվելու են հետեւյալ տրամաբանությամբ. 5 հազար մեքենայի քվոտա կտրվի քաղաքացիներին, 3 հազարը կտրվի դիլերներին»,-ասաց Փաշինյանը:

Նա նկատեց, որ շատ հարցերում ստիպված են կայացնել ոչ ճիշտ որոշումներ, որովհետեւ նախկինում կայացրած որոշումները համապատասխան չեն եղել պետականության տրամաբանությանը. «Անընդհատ այս ցիկլի մեջ ենք: Մի որոշում ենք կայացնում, որը բավարար պետական եւ ինստիտուցիոնալ չի, դրա արդյունքում կայացնում ենք հաջորդ որոշումը, որը էլի պետական ու ինստիտուցիոնալ չէ: Ինչ-որ մի X պահի այս գործելաոճը պետք է դադարեցնենք, որովհետեւ այսպես պետություն մենք չենք կառուցի»,- հայտարարեց վարչապետը: