ՑԱԽԱԼ–ը բուլդոզերով փլուզել է Լիբանանում ՄԱԿ–ի խաղաղապահների հենակետի մի մասը

Իսրայելի բանակը բուլդոզերով փլուզել է Լիբանանի սահմանային Ռաս ան-Նակուրա բնակավայրում գտնվող ՄԱԿ-ի ժամանակավոր ուժերի հենակետի պաշտպանական կառույցների մի մասը: Այս մասին հաղորդում է Լիբանանում խաղաղապահ զորախմբի մամուլի ծառայությունը:

«Ի պատասխան մեր հրատապ բողոքի՝ իսրայելական բանակը հերքել է իր որևէ գործողություն խաղաղապահների հենակետի տարածքում»,– նշվում է հաղորդագրության մեջ:

ՄԱԿ-ի ժամանակավոր ուժերի հրամանատարությունը նախազգուշացրել է իսրայելական կողմին, որ Իսրայելի բանակի ավերիչ գործողություններն ակնհայտ են և հանդիսանում են ՄԱԿ-ի Անվտանգության խորհրդի բանաձևերի բացահայտ խախտում։