Սպասելի չէր. Սրբուհի Գալյան

Սպասելի չէր, ես զբաղեցնում էի այլ պաշտոն, բայց առաջարկը ստանալուց հետո մտածել եմ ու տվել եմ իմ գիտակցված համաձայնությունը: Այս մասին կառավարության նիստից հետո լրագրողների հետ զրույցում ասաց նորանշանակ արդարադատության նախարար Սրբուհի Գալյանը՝ պատասխանելով հարցին սպասելի՞ էր իր թեկնածության առաջադրումը, ապա` նշանակումը:

Հարցին՝ ՔՊ-ի մեղքի և պատասխանատվության բեռը, ձեր վրա էլ է ընկնելու, պատրա՞ստ եք դրան, նա պատասխանեց. «Ես նախկինում այդ բեռը ստանձնած արդեն եղել եմ, երբ հեղափոխությունից հետո զբաղեցրել եմ արդարադատության նախարարի տեղակալի պաշտոնը, այդ պատասխանատվության գիտակցումը նաև պայմանավորել է իմ համաձայնություն տալը»:

Նա նշեց, որ մտավախութուն չունի, որ ՔՊ-ի պատգամավորները մի օր էլ իր դեմ ստորագրահավաք կսկսեն: «Գործադիր մարմնում աշխատող մարդու գործը պետք է լինի գործ անելը և մտահոգություններ ունենալ. կարծում եմ տեղին չէ»,- ասաց Գալյանը:

Նրա խոսքով՝ արդարադատության նախարարի հիմնական անելիքը քաղաքական մակարդակում արդարության հարցի ճիշտ հասցեագրումն է առաջին հերթին և երկրորդը նոր արդարադատության համակարգի կայուն և միասնական չափանիշների վրա հիմնված զարգացումը:

«Այս կոմպոնենտի պահպանմամբ մենք կփորձենք նախ վեր հանել խնդիրը՝ հասկանալու համար թե որտեղ է իրականում արդարության պակասի զգացումը ձևավորվում մեր քաղաքացիների մոտ, հետո կփորձենք կամաց-կամաց սահուն քայլերով լուծել այդ խնդիրը»,- ասաց նա:

Գալյանը նաև վստահեցրեց, որ ՀՀ-ում քաղբանտարկյալներ չկան: «Բոլոր քրեական գործերը, որոնք հարուցվել են, հարուցվել են կոնկրետ հնարավոր հանցավոր արարքներին որպես հակազդեցություն»,- շեշտեց նա: