Պատրաստ ենք վերանայել ցանկացած որոշում. Կոբախիձե
Վրաստանի իշխանությունները պատրաստ են վերանայել ցանկացած օրենք, եթե ինչ-որ մեկը համոզի, որ այն չի համապատասխանում իրավական սկզբունքներին։ Այս մասին հայտարարել է Վրաստանի վարչապետ Իրակլի Կոբախիձեն իտալական Sky TG24 հեռուստաալիքին տված հարցազրույցում։
«Եթե ինչ-որ մեկը մեզ համոզի, որ այս կամ այն օրենքը չի համապատասխանում իրավական սկզբունքներին կամ եվրոպական ոգուն, մենք պատրաստ ենք վերանայել ցանկացած որոշում, թեեւ դրա համար անհրաժեշտ են անկեղծ քննարկումներ», - հայտարարել է Կոբախիձեն:
Հիշեցնենք՝ ԵՄ-ի, ԱՄՆ-ի եւ Վրաստանի հարաբերությունները սկսել են զգալիորեն վատանալ մայիսին խորհրդարանի կողմից «օտարերկրյա ազդեցության թափանցիկության մասին» օրենքի ընդունումից հետո: Եվրամիությունը բազմիցս կոչ է արել Վրաստանի իշխանություններին հրաժարվել այդ օրենքից, սակայն իշխող «Վրացական երազանք - Ժողովրդավարական Վրաստան» կուսակցության առաջնորդները մշտապես պնդել են, որ օրենքի նպատակը Վրաստանում աշխատող ՀԿ-ների ֆինանսական հոսքերի թափանցիկությունն է, որոնցից մի քանիսը փորձել են երկրում հեղափոխություն կազմակերպել: Կոբախիձեն բազմիցս կոչ է արել արևմտյան գործընկերներին քննարկել այդ օրենքը։
