Խուլիգանության համար մեղադրվող Գրիշա Թամրազյանն արդարացվել է

Վ.Բրյուսովի անվան համալսարանի ռեկտորի գլխավոր խորհրդական Գրիշա Թամրազյանը, ում խուլիգանություն կատարելու մեղադրանք էր առաջադրվել, արդարացվել է։ Այս մասին տեղեկանում ենք փաստաբան Երվանդ Վարոսյանի գրառումից:

«2022 թվականի դեկտեմբերի 9-ին անփառունակ ձևով տապալվեց Վ.Բրյուսովի անվան համալսարանը նվաճելու «ամենաժողովրդավարական» իշխանության առաջին փորձը։ Վերընտրվեց Կարինե Հարությունյանը։ Ընտրության արդյունքը «ջրելու» գործընթացներին զուգահեռ, ինչպես արդեն ընդունված է ժողովրդավարության բաստիոնում, նախաձեռնվեցին քրեական վարույթներ...»,– գրել է փաստաբանը:

Նա նշել է, թե Հանրային հեռուստաընկերության եթերով ցուցադրվել է ռեպորտաժ, որ ընտրության օրը ռեկտորի գլխավոր խորհրդական Գրիշա Թամրազյանը հայհոյանքներ է հնչեցրել այդ ժամանակ ԿԳՄՍ նախարար Դումանյանի հասցեին։ «Մի քանի օր անց, Սիսակ անունով մի պատգամավոր հիշեց, որ նման ռեպորտաժ է տեսել ու հանցագործության մասին հաղորդում հղեց ՀՀ գլխավոր դատախազին»։

Փաստաբանը շարունակում է, որ դրանից հետո նախաձեռնվել է քրեական վարույթ, Գրիշա Թամրազյանի նկատմամբ սկսվել է քրեական հետապնդում, նրան մեղադրանք է առաջադրվել խուլիգանություն կատարելու համար, ընտրվել են խափանման միջոցներ, այդ թվում պաշտոնավարման կասեցումը, հետո քրեական գործը մեղադրական եզրակացությամբ ուղարկվել է դատարան...


«Ու այս ողջ ընթացքը երկար-բարակ հաղորդագրություններով հանրությանն էին ներկայացնում քրեական հետապնդման մարմինները: Իսկ այն մասին, որ Գրիշա Թամրազյանն արդարացվել է դատարանում` լռություն։

Ինչևէ, այսօր ստացանք ՀՀ վճռաբեկ դատարանի որոշումը, որով դատարանը մերժել է վարույթ ընդունել ՀՀ գլխավոր դատախազի տեղակալի կողմից ներկայացված բողոքն ու օրինական ուժի մեջ է թողնել Գրիշա Թամրազյանի արդարացման դատավճիռը...»,– գրել է նա: