Արարատ Միրզոյանը կմեկնի Թուրքիա. ԱԳՆ
Հոկտեմբերի 18-ին ՀՀ ԱԳ նախարար Արարատ Միրզոյանը աշխատանքային այցով կլինի Թուրքիայում՝ մասնակցելու Ստամբուլում կայանալիք «3+3» տարածաշրջանային խորհրդակցական հարթակի երրորդ հանդիպմանը: Այս մասին տեղեկացրել է ԱԳՆ մամուլի խոսնակ Անի Բադալյանը:
Նա հավելել է, որ այց ընթացքում ծրագրված են նաև երկկողմ հանդիպումներ:
Ավելի վաղ, հղում անելով թուրքական զլմ–ներին, հայտնել էինք, որ Թուրքիայի նախագահ Ռեջեփ Թայիփ Էրդողանը Ստամբուլում «3+3» հարթակի ԱԳ նախարարների հանդիպման շրջանակում կընդունի Հայաստանի արտգործնախարար Արարատ Միրզոյանին:
Նշվում էր, որ «3+3» հարթակի շրջանակներում կայանալիք հանդիպմանը Հայաստանի և Թուրքիայի արտգործնախարարները կքննարկեն Անկարայի աջակցությունը Երևանի և Բաքվի միջև խաղաղության ստորագրման հարցում, ինչպես նաև հայ-թուրքական հարաբերությունների կարգավորումը:
