Պայթյուններ Կոպենհագենում Իսրայելի դեսպանատան մոտ
Երկու պայթյուն է տեղի ունեցել Կոպենհագենում Իսրայելի դեսպանատան մոտ։ Այս մասին հայտնել է Դանիայի ոստիկանությունը X սոցցանցում։
«Նախնական տվյալներով՝ տուժածներ չկան, հետաքննություն է ընթանում։ Իշխանություններն ուսումնասիրում են պայթյունների հնարավոր կապը մոտակայքում գտնվող Իսրայելի դեսպանատան հետ»,-ասվում է հաղորդագրության մեջ։
Հոկտեմբերի 1-ին Իրանը հրթիռային հարված էր հասցրել Իսրայելին՝ առնվազն 400 բալիստիկ հրթիռ արձակելով ռազմական օբյեկտների ուղղությամբ։
Իսլամական հեղափոխության պահապանների կորպուսի (ԻՀՊԿ) տվյալներով՝ հրթիռների 80%-ը հասել է թիրախներին։ Իրանական ԶԼՄ-ները հայտնում են Աշքելոնի շրջանում գազային հարթակների և Նևաթիմ ավիաբազայի խոցման մասին:
Իսրայելական «9» հեռուստաալիքը, հղում անելով ՑԱԽԱԼ-ին, հայտնել է, որ հարձակումն անհետևանք չի մնա: ԻՀՊԿ-ն իր հերթին զգուշացրել է, որ Իսրայելի ցանկացած գործողության պատասխանը կործանարար կլինի:
