PayPal–ը կսահմանի ծառայությունների երկարաձգման վճար՝ ռուսաստանցի օգտատերերի ոչ ակտիվ հաշիվների համար
Ամերիկյան PayPal էլեկտրոնային վճարային համակարգը հոկտեմբերի 7-ից միջնորդավճար կսահմանի Ռուսաստանից օգտատերերի ոչ ակտիվ հաշիվների համար, ասվում է ծառայության տեղեկագրում, գրում է РБК–ն:
«Մենք սահմանում ենք ծառայությունների երկարաձգման վճար՝ ձեր հաշիվը պահպանելու համար, եթե ձեր PayPal հաշվում մնացորդ ունեք ցանկացած արժույթով: Վճարը վերաբերում է անձնական և բիզնես հաշիվներին»,- ասվում է PayPal-ի կայքում տեղադրված հատուկ ծանուցման մեջ: Նշվում է, որ վճարը տարին մեկ անգամ կգանձվի դրական մնացորդով հաշիվներից, որոնք վերջին 12 ամիսների ընթացքում չեն գործել։
Այն կկազմի երեքուկես հազար ռուբլի կամ դրա համարժեքը այլ արժույթով, նշում է РБК-ն։ Եթե հաշվի մնացորդը պակաս է միջնորդավճարից, ապա համակարգը դուրս կգրի ողջ մնացորդը:
Օգտատերերը, ովքեր համաձայն չեն նոր կանոնների հետ, պետք է փակեն իրենց հաշիվները նախքան փոփոխություններն ուժի մեջ մտնելը:
