Աշխատանքային պայմանագրերը կթվայնացվեն, էլեկտրոնային ստորագրությունը պարտադիր կդառնա

Աշխատանքային պայմանագրերի թվայնացումը, էլեկտրոնային ստորագրությունը 2026 թվականի հունվարի 1-ից պարտադիր կլինեն։ Այս մասին «Աշխատանքային պայմանագրերի թվայնացում. Աշխատանքային խախտումների իրական լուծո՞ւմ, թե՞ կոսմետիկ բարեփոխում» թեմայով քննարկման ժամանակ ասել է ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը։

Վստահեցրել է` փոփոխության նպատակն է աշխատանքային իրավունքների պաշտպանության մակարդակը բարձրացնել։

«Նախատեսում ենք, որ բոլոր աշխատանքային պայմանագրերը կնքվելու են միայն թվային համակարգի միջոցով։ Կիրարկումը փուլային ենք դրել։ Առաջին փուլով նախատեսում ենք, որ հաջորդ տարվա հուլիսի 1-ից կամավոր սկզբունքով կլինի կնքումը։ 2026-ի հունվարի 1-ից արդեն բոլորի համար պարտադիր կլինի աշխատանքային` իրենց պայմանագրերի կնքումը և ստորագրումը միայն թվային հարթակում։ Որևէ թղթային տարբերակ նախատեսված չէ, և բոլորը մշտապես կունենան հասանելիություն իրենց պայմանագրերի վերաբերյալ»,– նշել է սոցապ փոխնախարարը։

Նա ընդգծել է, որ ՊԵԿ-ի կայքում թվային պայմանագրերի համակարգ կներդրվի և մինչև հայտ լրացնելը գեներացվելու է աշխատանքային պայմանագիր։

Սարգսյանը շեշտել է նաև, որ նմանատիպ փոփոխությունների շնորհիվ վարչարարության, հավելյալ ծախսերը կնվազեն, աշխատանքային պայմանագրերն էլ ավելի գրագետ կարվեն։