100% մաքսատուրք կսահմանվի. Թրամփը նոր հռչակագիր է ստորագրել

ԱՄՆ նախագահ Դոնալդ Թրամփը հայտարարել է, որ մաքսատուրքեր կսահմանի անօդաչու սարքերի և դրանց բաղադրիչների ներմուծման վրա, այդ թվում՝ ԱՄՆ-ի մի շարք կարևոր դաշնակիցներից ներմուծվողների համար։ 

Թրամփի ստորագրած հռչակագրի համաձայն՝ Սպիտակ տունը 100% ներմուծման մաքսատուրք է սահմանում որոշակի չափի կամ ազգային անվտանգության համար առանձնակի զգայուն համարվող որոշ բնութագրերով դրոնների վրա։ 100% մաքսատուրք կգործի 25 կգ-ից ավելի առավելագույն թռիչքային զանգված ունեցող ԱԹՍ-ների ներմուծման համար, 25% մաքսատուրք՝ ավելի փոքր թռիչքային զանգված ունեցող ԱԹՍ–ների: 

15% մաքսատուրք կսահմանվի Եվրոպական միությունից, Ճապոնիայից, Լիխտենշտեյնից, Հարավային Կորեայից, Շվեյցարիայից և Թայվանից ներմուծվող անօդաչու սարքերի և բաղադրիչների վրա, իսկ Մեծ Բրիտանիայից եկող դրոնների համար դրույքաչափը կկազմի 10%, հավելել են Սպիտակ տանը։

ԱՄՆ առևտրի նախարարը կարծում է, որ որոշ արտասահմանյան ընկերությունների ԱԹՍ-ները և դրանց բաղադրիչները սպառնալիք են ներկայացնում Ամերիկայի ազգային անվտանգությանը, քանի որ դրանք կարող են տվյալներ ուղարկել արտադրողին: