Կահիրեում Գազայի հատվածում հրադադարի շուրջ բանակցություններն արդյունք չեն տվել

Գազայի հատվածում հրադադարի համաձայնագրի շուրջ բանակցությունների հերթական փուլը, որը տեղի ունեցավ Կահիրեում, արդյունք չտվեց, սակայն գործընթացը կշարունակվի, գրում է The Times of Israel-ը՝ վկայակոչելով ամերիկացի պաշտոնյային։

Հրատարակության աղբյուրի համաձայն, Կահիրեում բանակցությունները «կառուցողական են եղել և անցկացվել են վերջնական և գործունակ համաձայնության հասնելու ոգով, և բոլոր կողմերը կիսել են այս տեսակետը»:

Նրա խոսքով, «գործընթացը կշարունակվի առաջիկա օրերին աշխատանքային խմբերի շրջանակներում՝ հետագա քննարկման համար մնացած հարցերի ու դետալների համար»։

ԱՄՆ ազգային անվտանգության հարցերով խորհրդական Ջեյք Սալիվանը, Կանադայի Հալիֆաքսում կայացած մամուլի ասուլիսում ասել է, որ Վաշինգտոնը «դեռ տենդագին» աշխատում է Կահիրեում Եգիպտոսի և Քաթարի միջնորդների, ինչպես նաև իսրայելցիների հետ, հաղորդում են ԶԼՄ-ները:

«Հատկանշական է, որ ԱՄՆ պաշտոնյաները, թվում է, բանակցությունների միակ կողմն են, որոնք հույս են հայտնում դրանց հետագա առաջընթացի համար»,- նշում է թերթը։